五個月凑仔生涯的感覺

呀仔出世后，有幾次老公都會出廰或去細房睡。起初是因爲鼻寒，最近就因爲感冒。每次得我一個係房凑仔，我都覺得好孤獨。好似單親媽媽0甘。雖然就算老公同房，佢都睡到死豬0甘，次次個仔喊都係我自己搞掂，不過縂好過完全離開視綫範圍，好似事不關己0甘。

其實老公唔算超唔盡責的爸爸。但始終覺得做爸爸同做媽媽心態係好唔同。老公如果累，唔舒服，佢會覺得大條道理要休息。但做媽咪就無呢個option，因爲你幾辛苦，BB都一定要食，要人照顧，尤其是如果BB係埋身食人奶。而且就算老公願意幫忙，好多時都要你開口提佢。所以都係0個句，開得口0來我自己做0左啦。我覺得亦因爲0甘，媽媽係凑仔方面的能力同忍耐力係突飛猛進，但爸爸就依然係小學鷄程度。我估除非個媽媽本身係超懶，超求其，或超無責任感，否則，每個屋企的情況都係一樣。就算我有d朋友讚自己老公有責任感，但講到凑仔，佢地都認同d老公差少少。

未生時，我好期待家裏多個小朋友。覺得可以幫個家增添歡樂。雖然，軒軒真係幾搞笑，好多時都好開心，笑得好燦爛，但我縂覺得自從佢出世后，家裏的氣氛都係死死的。可能頭兩個月媽咪係到幫手，未有機會enjoy一家三口的感覺 （我0個兩個月直頭唔覺得自己生0左個仔，反而似幫媽咪凑仔一樣）。到第三個月媽咪走后又太辛苦，到第四個月就經歷花生離開，所以成件事無我預期般開心。又或者因爲我每日的時間變得好被動。永遠唔知道幾時可以完成工作。又要做家務，又怕找不到好的daycare，有無時間同恆心減肥。。。老公叫我約朋友出去，但第一我這邊朋友不多，第二每次想到我有九萬樣野未做，我就唔想出去。

另外，我發現我無以前0甘中意老公。以前我好中意痴住佢，但現在我比較想用空餘時間做我堆積如山的工作。我又唔覺得係個仔偷0左我對老公的愛。因爲根本唔同。我只覺得個仔偷0左我對花生的愛。老公真係純碎變得唔太吸引。所以整件事無我之前期待般溫馨。當然縂有些時候係sweet的。抱住仔仔，佢眼looklook望住我，摸我塊面時。不過，每次我見佢好似好愛我好需要我時，我都會想。。。你大個就唔會0架啦。反而以前問花生你愛唔愛我時，我會肯定花生一世都會最愛我。但對自己個仔反而無呢個感覺。可能我本身個人太悲觀，而且我都係好主觀認爲仔大個就一定係親老婆多d。希望之後一切會順利d,我心情會好d啦！唔想一件開心事係我記憶裏變成一件0甘灰的事。