Sep 26, 2016–Day 153

起身仔都未喂飽就收到同事sms 問有無興趣join lunch. 係得40分鐘準備加上無車情況下,決定再次挑戰自己。以爲Ethan會係巴士同skytrain眠一眠，最後差不多到達先暈低,即係眠得0個一陣。心想：賴野啦！點知最後個八卦仔因爲對身邊的環境太好奇，竟然差不多成餐飯都自己望來望去。走時我仲可以係書局磨了成粒鐘先返歸。超好彩。

軒軒的第一次
搭skytrain
係媽咪公司開餐
去鬼佬餐廳
搭交通工具加路程要成1個鐘

我0係一個出名的youtuber facebook留言了。

自從花生走后，我一直都想係一個出名的youtuber facebook留言。原因係佢有一隻同花生好似樣的貴婦狗加一個好可愛的BB仔。雖然好似好無目的，但總之就係想同佢分享下。不過一直都無做到。而且呢2個月都唔敢看她的youtube,因爲怕見到她的狗狗跟BB的生活點滴時我會更加唔開心。不過，昨日老公開了來看。我就逼自己看一下吧。一路看就一路幻想如果花生係到佢同軒軒會點相處。最後就鼓起勇氣做了呢個幾月以來心思思想做的事。留了言，她也回復了一大段安慰説話，雖然有d例牌。不過，其實我都唔預佢復，佢原因復我這個3唔識7的人已經好好。其實我只係好像分享一下我的小故事。好像呢一刻我都仲為佢做緊d野。我怕如果我唔做，佢會真正消失。。。就好似從來無係時間上存在過一樣。

最後我attach了這幾副照片。

Sep 22, 2016–Day 149 同軒軒第一次食拍拖lunch

呢幾日真係超勤力，日日幫屋企大掃除，報daycare，0羊住軒軒出去散步買菜，仲連續幾晚煮飯洗碗洗衣服。以前軒軒未出世就算有時間都hea下hea下，因爲知道大把時間。宜家反而因爲唔知幾時得閑，一有少少時間就chur爆自己。不過軒軒呢幾日自己玩時有d扭計，sleep training依然係半桶水，時好時壞。好多時最後都係要出殺手鐧。。。埋身餵。

講返今日。。。本來打算當做運動，0羊住軒軒行遠d買冲涼液之後到餐廳買外賣返屋企食。不過,因爲成朝都無點食野太肚餓，所以去到茶餐廳就直接坐低時，順便當挑戰自己，看看可不可以0羊住個仔都可以係街食野。當時其實軒軒睡着了。點知我一坐低佢就醒0左。加上個卡位有點窄，所以最後我就解開0羊帶單手抱住軒軒。可能因爲有條帶係底托一托，所以都幾順手。其實前兩日都0羊得唔太舒服。不過今日可能較好0左條帶，所以已經好好多。一路軒軒都好乖，所以我都可以慢慢嘆個飯。本來想叫d要用刀叉的。。。好彩最後無，因爲根本衹有一隻手食飯。

一路食飯，一路望住個仔，感覺好溫馨。呢個係我陀佢時其中一個期待的畫面（兩母子拍拖食野）。我呢個小女人其實都幾易滿足。就0甘成功一個人帶個仔係無0羊帶的情況下食個茶餐廳都覺得好有成功感。

之後，食完就打道回府，繼續好忙0甘執屋煮飯。一路執屋間中都會見到花生的遺物，潔齒骨，指甲。。。如果你仲係到就好啦。

生活小智慧 - 洗隔油網

一直叫老公幫抽油烟機買個新filter。。。佢一路話找不到，最後唯有靠自己。上網見到話煲一煲滾水加白醋同梳打粉，然後煲個filter五分鐘，之後用牙擦擦下就ok...果然得0左。。。快靚正！仲好有滿足！

Crispy Honey Sriracha Chicken Wings 香脆焗蜜糖是拉差鷄翼

好耐之前跟Food Wishes整過呢個蜜糖是拉差鷄翼。Chef John 聲稱呢個方法用焗爐都可以好脆。但第一次我失敗了，還以爲是食譜問題。之後朋友整過話work。所以我估失敗主因係我無鐵架隔開d雞翼同d油。今次買了鐵架。。。果然又脆又惹味。

食譜（完全跟以下Food Wishes,衹是打成中文版）

鷄翼2.5 磅
1湯匙粗鹽
1茶匙黑胡椒
1茶匙煙紅椒粉
2湯匙泡打粉

是拉差蜜糖醬：
1/3杯蜂蜜
1/3杯是拉差醬
1湯匙米醋
1/4茶匙麻油

1)預熱焗爐425F

2) 鷄翼先冲洗一下，然後抹乾。

3)把黑胡椒，煙紅椒粉和泡打粉拌匀。

4)將3 到進鷄翼拌匀。

5) 把鷄翼放在鐵架上，讓后放進焗爐。每15-20分鐘反一次。一共焗大概1小時。

6) 最後把鷄翼拿出來跟是拉差蜜糖醬拌匀即可。

食譜參考：

http://foodwishes.blogspot.ca/2015/01/crispy-honey-sriracha-chicken-wings.html

Day 142–Sep 15, 2016 軒軒第一個中秋節！(Oct 4, 2016 補寫)

今日係軒軒第一個中秋節。亦都係prenatal class reunion。因爲個reunion成7點先開始，所以我0地都預0左軒軒今日會比較夜先睡覺。

本身reunion應該係7月中，但可能老師忙，所以最後要幾個人email催佢先搞得成。個reunion本身都係大家分享下birth story同這幾個月的生活。可能之前BB們未出世，所以大家都唔係好有興趣聯絡。但今次大家都好踴躍留電話，之後仲整了個whatsapp group…宜家我電話有成3-4個 baby chats。

我發現自從軒軒出世，我突然認識多0左好多人。果然大家爲了孩子都會比較主動。講返呢個group, 我覺得相比起其他group呢個group的爸爸媽媽好像比較搞唔掂BB。大部分都話BB成日扭，night sleep前兩個小時係最扭計。有個仲話個女一定要某個姿勢抱先唔扭計。除了一個俄羅斯爸爸媽媽話佢0地BB好容易凑，完全唔喊之外，其他都講到BB很不受控制一樣。雖然，軒軒都成日扭計，但聽起來原來他已經算ok。之後,其中一個媽媽都話軒軒好厲害，坐足2個鐘都唔扭計，又唔洗食(好好彩，因爲臨出門剛巧吃飽)。其他BB全部去到尾都開始扭要抱住搖來搖去。（除了俄羅斯BB)

回家后，老公就趁我餵奶時把握時間set好月餅和燈籠影幅全家福。今年姨婆買了個燈籠比軒軒，不過寄遲左。。好彩Auntie Clara幫媽咪買到四個紙燈籠，嫲嫲又買了個迷你復古兔仔燈籠（我超終于傳統燈籠，終于係迷你用電版），所以都好滿足。唯一遺憾係花生連第一個中秋都同唔到我0地過。中秋唔能夠一家人齊齊整整太可惜了。

媽咪最後就叫爸爸點了（電蠟燭）四個燈籠，代表我們一家四口。我們就當天上的月亮係花生啦。（原來屋企露臺個setting影呢幅相都幾好）

就差你一個0查。

聽日中秋啦。你好嗎？就差你一個0查。

你走之前，我成日數細佬今日系幾多周大。你走后，我變左數你今日系走左第幾個禮拜。

其實我做錯0羊，個天要用呢個方式，呢個情況，呢個時間帶你走。連我地一家4口過一次節都唔比？你走前幾個鐘的畫面不停系我腦裏面轉。點解要0甘懲罰我？

呢排細佬多0左好多反應。你同佢系我心裏面d感覺開始overlap啦。好怕同你的感覺會慢慢系我腦裏面變淡。依家屋企有新野發生或添置新野，都成日幻想如果你系樹會有什麽反應，搞到好似平衡時空0甘有兩個畫面系腦里。一個真實但沒有你的和一個幻想但有你的。聽日就比我再幻想你有份同我地一齊過節啦。

中秋節快樂。花生豬。

September 5, 2016–Day 132 和爺爺嫲嫲飲茶

一連3日假期快結束，明天老公又要開工。這幾天我們也沒有去什麽地方。因爲要繼續sleep train軒軒。話説上星期三同其他媽咪gathering之後兩日，軒軒又恢復之前不停哭不肯睡覺的狀況。有時連睡得最好的晚上也醒來2次。本來我以爲衹要知道不會傷害到他，我忍受到讓他自己哭個夠。但當每日幾次，每次30分鐘的哭聲。。。我人都開始有點崩潰。加上我始終沒有看過那邊教學書，很怕自己apply的方法錯了。又怕哭得多對他心理發展不好。而且他一次比一次哭得長。感覺好像每次也是重新開始，沒有改善，所以我也很沮喪。不過，我沒有完全放棄。但就沒前兩天那麽堅定，試過幾次最後進去埋身餵他等他睡着。到星期六日都系一半半0甘試，但看得出他睡午覺比以前哭短了時間。那也算有一點點成績吧？

今天帶軒軒跟爺爺嫲嫲飲茶。軒軒全程都在睡覺，睡了差不多1.5小時。我們就會吃飽就弄醒他讓他跟爺爺嫲嫲玩了一會。睡飽的軒軒也很乖，不停笑。之後我們去walmart, 主要是因爲軒軒食手情況太嚴重，所以想買個新奶嘴，看看他願不願意吃。這次也是買同一個牌子，不過另一個款。希望他會用啦。

 

今日我地第一次系街用baby carrier。爸爸話條背帶都幾舒服。但如果全日用應該都幾累。（佢都系想暗示買架輕便BB車遲d去日本呢個決定系正確姐！）

好搞笑，個奶嘴系夜光的。話方便夜晚找奶嘴喔~

去急症室了~

因爲我有UTI，而且已經幾天也沒有好轉，所以今天Vivian就叫我在她當值時去急症室找她。估唔到4個月前生軒軒第一去完急症室，那麽快又來。但感覺真是百感交雜。雖然見朋友在急症室工作，感覺很搞笑。她站著其他高高大大的外國人護士身邊時，一點都不像醫生。感覺好像小朋友。同時我又想起4個月前花生還在家裏等我和老公回家。

在醫院待了2小時，吃完抗生素就離開了。回家路上我又不爭氣地哭了。想著短短四個月，他就已經離開了。那晚老公終于在跟我談起花生來。他說每當他想起花生，他就告訴自己已經過去了。不要把思緒都轉進去。他叫我也盡量不要再逼自己想。但我的方法剛好相反。我總是喜歡不停的想，還把最壞的畫面不同重複。我怕我不想不想，突然有一天在想起來會再一次承受不了。我其實現在已經慢慢平復。但感覺人生總是差了點什麽。好像這個家，還有我們的將來都不會太開心和幸福了。我也不知道是因爲花生，還是因爲湊軒軒把自己困得太多，人變得好灰。我覺得自己跟這個世界有點格格不入。我不太會形容那種感覺。反正就好像其他人都比我有life比我幸福，而我好像跟以前不一樣了。就是每天很麻木的湊軒軒，而且所有野都很被動。每天也不知道今天有多少時間做其他野。而且就算做得完，把這個家打理好，這個家還是不再完整。

我究竟幾時先可以真正放下？明明看著軒軒一天一天成長是一件幸福的事。爲什麽我偏偏那麽提不起勁？